Álit

   

I Kvörtun og afmörkun athugunar

Hinn 16. nóvember 2024 leitaði A til umboðsmanns Alþingis með kvörtun yfir viðbrögðum mennta- og starfsþróunarseturs lögreglu við beiðni hans um að gagnvart honum yrði byggt á öðrum viðmiðum hvað snertir kröfur um líkamlega færni til nema í starfsnámi hjá lögreglu, á grundvelli tiltekinnar heimildar mennta- og starfsþróunarseturs þar að lútandi í reglugerð.

Við athugun mína á þessu máli hef ég staðnæmst við það hvort kröfur um líkamlega færni til starfsnema sem ákveðnar voru af mennta- og starfsþróunarsetri, sem starfar innan embættis ríkislögreglustjóra, hafi verið settar í samræmi við lög. Í ljósi framkominna skýringa ríkislögreglustjóra og dómsmálaráðuneytisins er athugun mín afmörkuð við þetta álitaefni.

  

II Málavextir

A er starfandi lögreglumaður hjá embætti lögreglustjórans [...]. Hann var skráður í námsleiðina Nútímafræði við Háskólann á Akureyri en hafði í því námi lokið flestum þeim námskeiðum sem eru hluti af diplómanámi í lögreglufræðum fyrir verðandi lögreglumenn. Stefndi hann að því að ljúka lögreglunámi, þar á meðal starfsnámi hjá lögreglu. Af þessu tilefni beindi hann erindi til mennta- og starfsþróunarseturs 6. apríl 2024. Í erindinu óskaði hann þess að gagnvart honum yrði byggt á öðrum viðmiðum hvað snertir kröfur mennta- og starfsþróunarseturs til nema í starfsnámi hjá lögreglu um líkamlega færni. Beiðni sinni til stuðnings vísaði A til heimildar sem mennta- og starfsþróunarsetri er fengin til að setja önnur viðmið fyrir héraðslögreglumenn og afleysingamenn um andlegt og líkamlegt heilbrigði, þrek og styrk í reglugerð nr. 221/2017, um mennta- og starfsþróunarsetur lögreglu. Hann vísaði einnig til þess að þeirri heimild hefði verið beitt áður með því skilyrði að lögreglumenn hefðu verið fimm ár í starfi. Í því sambandi tók hann fram að hann hefði starfað sem lögreglumaður frá [...].

Mennta- og starfsþróunarsetur svaraði beiðni A með tölvupósti 8. apríl 2024. Þar kom fram að það fyrirkomulag sem A vísaði til væri ekki lengur í boði. Síðan sagði svo:

Miðað við það sem kemur fram í bréfinu ert þú skráður í diplómanám í lögreglufræði fyrir verðandi lögreglumenn. Ekkert svigrúm er til þess að gera undanþágur á inntökuskilyrðum í það nám, enda um aðra námsbraut að ræða en þá sem þú vísar til í bréfinu varðandi 5 ára starfsreynslu.

Að fengnum þessum viðbrögðum leitaði A sem fyrr greinir til umboðsmanns með kvörtun.

 

III Samskipti umboðsmanns og stjórnvalda

Með bréfi til mennta- og starfsþróunarseturs lögreglu 4. desember 2024 var óskað eftir afriti af gögnum málsins og að mennta- og starfsþróunarsetur lýsti viðhorfi sínu til kvörtunar A eftir því sem það teldi tilefni til. Þá var þess sérstaklega óskað að veittar yrðu nánari upplýsingar um á hvaða lagagrundvelli kröfur mennta- og starfsþróunarseturs til nemenda í lögreglufræðum um líkamlega færni byggðust.

Svar mennta- og starfsþróunarseturs barst 14. janúar 2025. Um lagagrundvöll þeirra krafna sem gerðar eru um líkamlega færni segir eftirfarandi:

Fjallað er um inntökuskilyrði nema í starfsnám í 38. gr. lögreglulaga en samkvæmt c-lið 1. mgr. ákvæðisins skulu nemar í starfsnámi vera andlega og líkamlega heilbrigðir og standast læknisskoðun trúnaðarlæknis samkvæmt fyrirliggjandi kröfum sem mennta- og starfsþróunarsetur lögreglu setur reglur um í samstarfi við háskóla.

Einnig er fjallað með nánari hætti um inntökuskilyrði nema í starfsnámið í reglugerð nr. 221/2017 um mennta- og starfsþróunarsetur lögreglu. Þar er í c-lið 2. mgr. 6. gr. fjallað um líkamlega færni, þar sem segir að nemar skuli vera andlega og líkamlega heilbrigðir og standast læknisskoðun trúnaðarlæknis samkvæmt fyrirliggjandi kröfum sem mennta- og starfsþróunarsetur lögreglu setur reglur um. Í 3. mgr. 6. gr. sömu reglugerðar segir jafnframt að [mennta- og starfsþróunarsetri lögreglu] sé heimilt að setja önnur viðmið, skv. c- og e-lið 2. mgr. 6. gr. fyrir héraðslögreglumenn og afleysingarmenn.

Með vísun til framangreinds er ljóst að löggjafinn hefur falið [mennta- og starfsþróunarsetri] að leggja mat á líkamlegt heilbrigði umsækjanda um inngöngu í starfsnámið.

Mennta- og starfsþróunarsetri var að nýju ritað bréf 11. mars 2025 þar sem þess var meðal annars óskað að það léti umboðsmanni í té rökstudda afstöðu sína til þess hvort það væri dómsmálaráðherra eða mennta- og starfsþróunarsetur sem væri bært til að setja reglur þar sem mælt væri fyrir um kröfur um líkamlega færni til nema í starfsnámi. Í svari ríkislögreglustjóra 11. apríl 2025 eru sjónarmið embættisins rakin ítarlega. Tekið er fram að það sé „skýr afstaða embættis ríkislögreglustjóra að það sé Mennta- og starfsþróunarsetur lögreglu, sem er bært til þess að setja reglur þar sem mælt er fyrir um kröfur um líkamlega færni fyrir nema í starfsnámi“. Athugasemdir A við þessar skýringar bárust umboðsmanni 28. janúar og 27. apríl 2025.

Að fenginni afstöðu ríkislögreglustjóra var dómsmálaráðuneytinu ritað bréf 13. nóvember 2025 þar sem sama spurning var borin upp, það er að segja hvort það sé dómsmálaráðherra eða mennta- og starfsþróunarsetur sem er bært til þess að setja reglur þar sem mælt er fyrir um líkamlega færni nema í starfsnámi hjá lögreglu. Í þessu efni var vísað til ákvæða e-liðar 1. mgr. 38. gr. lögreglulaga nr. 90/1996 og e-liðar 2. mgr. 6. gr. reglugerðar nr. 221/2017, um mennta- og starfsþróunarsetur lögreglu.

Í svari dómsmálaráðuneytisins 5. desember 2025 eru ákvæði 37., 38. og 39. gr. lögreglulaga nr. 90/1996 rakin ásamt lögskýringargögnum sem búa þeim að baki. Auk þess er fjallað um ákvæði laga nr. 63/2006, um háskóla, og laga nr. 85/2008, um opinbera háskóla. Að svo búnu er í svarinu vikið að reglugerð nr. 221/2017, um mennta- og starfsþróunarsetur lögreglu, og tiltekin ákvæði hennar rakin. Síðan segir svo:

Eins og að framan greinir, er kveðið á um í e-lið 1. mgr. 38. gr. lögreglulaga að nemar í starfsnámi skulu fullnægja almennum skilyrðum samkvæmt nánari kröfum sem ráðherra setur með reglugerð, á grundvelli tillagna frá [mennta- og starfsþróunarsetri lögreglu], m.a. um menntun, starfsþjálfun, tungumálakunnáttu og líkamlega færni. Þá segir í 39. gr. a. sömu laga að ráðherra setji í reglugerð, að fenginni tillögu [mennta- og starfsþróunarseturs], nánari fyrirmæli um framboð sérhæfðra námskeiða, inntökuskilyrði nema í starfsnám og starfsemi [mennta- og starfsþróunarseturs].

Í e-lið 2. mgr. 6. gr. reglugerðar nr. 221/2017 hefur ráðherra sett fram þá kröfu að til að skilyrði um líkamlega færni séu uppfyllt, skuli meta þrek og styrk nema skv. þeim viðmiðum sem [mennta- og starfsþróunarsetur] setur. Þau viðmið hefur [mennta- og starfsþróunarsetur] sett fram í leiðbeiningum um þrekpróf þar sem ítarlega er gert grein fyrir þeim æfingum sem liggja til grundvallar mati á styrk og þreki ásamt þeim mælikvörðum sem frammistaða fyrir hverja æfingu er metin til einkunnar.

Samkvæmt öllu ofangreindu er því í lögreglulögum og reglugerð nr. 221/2017, skýrlega mælt fyrir um þau skilyrði sem [mennta- og starfsþróunarsetri] ber að leggja til grundvallar vali á nemum í starfsnám lögreglu, enda ber setrinu í samráði við háskóla að meta hvort uppfylltar séu kröfur laganna sem og reglugerðarinnar hvað líkamlega færni varðar, sem samkvæmt kröfu reglugerðarinnar skal metin á grundvelli þreks og styrks skv. viðmiðum [mennta- og starfsþróunarseturs]. Þá kveður reglugerðin jafnframt á um að heimilt sé að láta hæfa umsækjendur undirgangast inntökupróf sem og önnur próf sem rétt þykir að framkvæma.

Að auki er gefin út Handbók um inntökuferli nemenda í lögreglufræðinám hjá Háskólanum á Akureyri þar sem nánar er fjallað um inntökuskilyrði til námsins. Þá hafa jafnframt verið birtar Leiðbeiningar um mat á heilbrigði umsækjanda vegna umsóknar um nám í lögreglufræðum, sbr. c-lið 1. mgr. 38. gr. lögreglulaga, sbr. c-lið 6. gr. reglugerðar 221/2017.

Ítarlegar upplýsingar liggja því fyrir um þau skilyrði sem umsækjendur um starfsnám þurfa að fullnægja, m.a. mjög ítarlegar leiðbeiningar um efni og framkvæmd þrek og styrkprófa byggðum á viðmiðum sem [mennta- og starfsþróunarsetur] hefur sett skv. kröfu reglugerðar nr. 221/2017. Nemar sem hefja nám í lögreglufræðum geta því með aðgengilegum hætti fengið upplýsingar um hvaða skilyrði þeir þurfi að fullnægja til að standast hina lögbundnu kröfu um líkamlega færni, sem er skv. e-lið 1. mgr. 38. gr. reglugerðar nr. 221/2017, að nemar uppfylli viðmið [mennta- og starfsþróunarseturs] um þrek og styrk. Nemar geta því fyrirfram gert sér grein fyrir hvað fyrirmæli laganna hafa í för með sér fyrir þá og lagað sig að þeim.

Að endingu er í skýringum ráðuneytisins fjallað um úrlausnir umboðsmanns Alþingis í málum sem lúta með einum eða öðrum hætti að inntökuskilyrðum í starfsnám hjá lögreglu.

 

IV Athugun umboðsmanns Alþingis

1 Lagagrundvöllur

Um menntun lögreglu er fjallað í VIII. kafla lögreglulaga nr. 90/1996. Mennta- og starfsþróunarsetur lögreglu starfar innan embættis ríkislögreglustjóra, sbr. 1. mgr. 37. gr., og hefur meðal annars það hlutverk að annast starfsnám nema í lögreglufræðum við háskóla, í samstarfi við háskóla, sbr. a-lið 2. mgr. 37. gr. og 1. mgr. 38. gr. laganna. Í síðastnefndu málsgreininni er jafnframt fjallað nánar um inntökuskilyrði í námið í stafliðum a til f, eins og þeim var breytt með c-lið 5. gr. laga nr. 61/2016, um breytingu á lögreglulögum o.fl. Þar kemur eftirfarandi fram:

Mennta- og starfsþróunarsetur lögreglu annast starfsnám lögreglunema og velur nema í starfsnám í samstarfi við háskóla. Ákvörðun setursins um val á nemum í starfsnám er endanleg. Nemar í starfsnámi skulu fullnægja eftirtöldum almennum skilyrðum:

[...]

c. vera andlega og líkamlega heilbrigðir og standast læknisskoðun trúnaðarlæknis samkvæmt fyrirliggjandi kröfum sem mennta- og starfsþróunarsetur lögreglu setur reglur um í samstarfi við háskóla,

[...]

e. samkvæmt nánari kröfum sem ráðherra setur með reglugerð, á grundvelli tillagna frá mennta- og starfsþróunarsetri lögreglu, m.a. um menntun, starfsþjálfun, tungumálakunnáttu og líkamlega færni.

Samkvæmt ofangreindu er það hlutverk ráðherra að gera með reglugerð nánari kröfur til nema í starfsnámi, meðal annars um líkamlega færni. Á hinn bóginn er það hlutverk mennta- og starfsþróunarseturs að setja í samstarfi við háskóla reglur um kröfur til andlegs og líkamlegs heilbrigðis sem nemar í starfsnámi skulu standast samkvæmt læknisskoðun trúnaðarlæknis. Ekki er sérstaklega fjallað um þann greinarmun sem gerður er þarna á í lögskýringargögnum. Helst verður þó ráðið að hann felist í því að með líkamlegri færni sé átt við mælanlegan árangur í verklegri prófraun þar sem reyna kann á atriði á borð við þol, liðleika, styrk og samhæfingu. Aftur á móti felist í andlegu og líkamlegu heilbrigði, í ofangreindum skilningi, krafa um tiltekið almennt ástand hvað snertir andlegt og líkamlegt heilsufar og eftir atvikum hvort fyrir hendi séu kvillar, svo sem sjúkdómar, sem kunni að hafa áhrif á getu umsækjanda til að sinna starfi lögreglumanns.

Í athugasemdum við ákvæði c-liðar 5. gr. frumvarps þess sem varð að lögum nr. 61/2016 segir svo um skipulag og reglur um val á nemum í starfsnám hjá lögreglu:

Í greininni er kveðið á um að mennta- og starfsþróunarsetur lögreglu annist starfsnám lögreglunema og velji nema í starfsnám í samstarfi við háskóla. Lagt er til að ákvörðun setursins um val á nemum í starfsnám sé endanleg en við málsmeðferð sé gætt að ákvæðum stjórnsýslulaga. Í greininni er jafnframt kveðið [á] um þau skilyrði sem nemar í lögreglufræðum þurfa að fullnægja til að geta hafið starfsnám hjá lögreglu.

Í núgildandi lögum er kveðið á um inntökuskilyrði við Lögregluskóla ríkisins og er með frumvarpi þessu miðað við að stuðst verði við sambærileg skilyrði og verið hefur, að því undanskildu að aldurshámark hefur verið afnumið og gerð er krafa um stúdentspróf eða sambærilega menntun. Í e-lið 1. mgr. ákvæðisins er kveðið á um [að] ráðherra setji nánari kröfur til nema í starfsnámi hjá lögreglu, m.a. um menntun, starfsþjálfun, tungumálakunnáttu og líkamlega færni, með reglugerð sem sett er á grundvelli tillagna mennta- og starfsþróunarseturs og háskóla. [...]

Með því að færa lögreglumenntun á háskólastig verður það á ábyrgð háskóla að velja nýnema í lögreglufræðum í samræmi við ákvæði laga um háskóla en rétt er að geta þess að samkvæmt þeim lögum er háskóla heimilt að ákveða sérstök inntökuskilyrði til að hefja nám í háskóla. Með ákvæði þessu er lagt til að nemar í lögreglufræðum skuli uppfylla tiltekin almenn skilyrði til að geta hafið starfsnám hjá lögreglunni. Það verður hlutverk mennta- og starfsþróunarsetursins að sannreyna hvort nemar uppfylli umrædd skilyrði en setrið ber jafnframt ábyrgð á vali starfsnema (þskj. 1215 á 145. löggjafarþingi 2015-2016, bls. 13).

Í framangreindum athugasemdum er áréttað að ráðherra „setji nánari kröfur til nema í starfsnámi hjá lögreglu, m.a. um menntun, starfsþjálfun, tungumálakunnáttu og líkamlega færni, með reglugerð“ en það komi í hlut mennta- og starfsþróunarseturs að gera tillögur til ráðherra um þær kröfur svo og að sannreyna hvort nemar uppfylli þær.

Nánar er fjallað um inntökuskilyrði nema í starfsnám hjá lögreglu í 6. gr. reglugerðar nr. 221/2017, um mennta- og starfsþróunarsetur lögreglu. Reglugerðin var sett af dómsmálaráðherra samkvæmt heimild í 39. gr. a í lögum nr. 90/1996, þar sem meðal annars kemur fram að ráðherra setji í reglugerð, að fenginni tillögu mennta- og starfsþróunarseturs, nánari fyrirmæli um inntökuskilyrði nema í starfsnám.

Mennta- og starfsþróunarsetur lögreglu auglýsir eftir nemendum í starfsnám og velur nema í starfsnám í samstarfi við háskóla, sbr. 1. mgr. 6. gr. reglugerðarinnar. Í 2. mgr. greinarinnar segir síðan:

Nemar í starfsnámi skulu fullnægja eftirtöldum almennum skilyrðum:

[...]

c. vera andlega og líkamlega heilbrigðir og standast læknisskoðun trúnaðarlæknis samkvæmt fyrirliggjandi kröfum sem mennta- og starfsþróunarsetur lögreglu setur reglur um,

[...]

e. hafa staðist kröfur um þrek og styrk skv. viðmiðum sem mennta- og starfsþróunarsetur setur,

[...]

Samkvæmt framangreindu hefur ráðherra með e-lið 2. mgr. 6. gr. reglugerðarinnar ákveðið að fela mennta- og starfsþróunarsetri að setja viðmið um líkamlega færni sem innihalda kröfur um þrek og styrk. Aftur á móti er c-liður málsgreinarinnar efnislega samhljóða c-lið 1. mgr. 38. gr. lögreglulaga.

Þær kröfur mennta- og starfsþróunarseturs um líkamlega færni sem voru í gildi þegar atvik málsins áttu sér stað voru settar fram í viðmiðunum „Þrekpróf fyrir umsækjendur í lögreglufræði fyrir verðandi lögreglumenn 2024“ sem mennta- og starfsþróunarsetur lögreglu samdi.

  

2 Framsal valds til mennta- og starfsþróunarseturs lögreglu

Svo sem tekið er fram í upphafi er athugun mín á málinu afmörkuð við að kanna hvort kröfur mennta- og starfsþróunarseturs lögreglu um líkamlega færni til nemenda í starfsnámi hjá lögreglu hafi verið settar af þar til bærum aðila með þeim hætti sem lög áskilja. Þótt ekki liggi fyrir að A hafi sótt um starfsnám hjá lögreglu, tel ég rétt að taka þetta atriði til nánari athugunar þar sem ráðið verður að mennta- og starfsþróunarsetur byggi almennt á umræddum kröfum við ákvörðun um inntöku nema í starfsnám hjá lögreglu. Hef ég þá einnig í huga að A hefur lokið flestum námskeiðum í diplómanámi í lögreglufræðum og hefur samkvæmt kvörtuninni hug á því að hefja starfsnám.

Af lögmætisreglu stjórnsýsluréttar leiðir að þegar ráðherra er með lögum falið að setja stjórnvaldsfyrirmæli um tiltekið efni með reglugerð hefur hann almennt ekki val um form þeirra stjórnvaldsfyrirmæla sem Alþingi hefur ákveðið að sett skuli, eða vald til þess að fela öðru stjórnvaldi að setja þau, nema það komi skýrlega fram í lögum, sbr. 2. gr. stjórnarskrárinnar.

Í þessu sambandi bendi ég á að þegar reglugerð er sett skal birta hana í Stjórnartíðindum, sbr. 1. gr. laga nr. 15/2005, um Stjórnartíðindi og Lögbirtingablað. Þegar löggjafinn hefur ákveðið að ráðherra skuli setja stjórnvaldsfyrirmæli í formi reglugerðar leiðir þannig af því að efni hennar skal birt almenningi opinberlega og með nánar tilgreindum hætti. Þessu til grundvallar liggja viss réttaröryggissjónarmið um að réttarreglur séu aðgengilegar þannig að tryggt sé að hægt sé að kynna sér efni og tilvist þeirra, sjá til hliðsjónar álit umboðsmanns Alþingis 29. desember 2006 í máli nr. 4597/2005. Þrátt fyrir að óbirt fyrirmæli bindi stjórnvöld frá gildistöku þeirra öðlast reglugerðir bindandi áhrif gagnvart öðrum við birtingu þeirra, sbr. 8. gr. laga nr. 15/2005. Í tilefni af skýringum ráðuneytisins tek ég fram að í þessum efnum dugar birting á vefsvæði stjórnvalda ekki.

Í skýringum sínum til mín hefur embætti ríkislögreglustjóra vísað til ákveðinna sjónarmiða til stuðnings þeirri afstöðu þess að mennta- og starfsþróunarsetur sé, fremur en ráðherra, bært til að setja reglur um líkamlega færni nema í starfsnámi. Þau sjónarmið lúta meðal annars að því að með vísan til málefnalegra valdmarka sé heppilegast að svo sé búið um hnútana, enda búi mennta- og starfsþróunarsetur yfir nauðsynlegri sérþekkingu til að ákveða hvaða kröfur skuli gerðar til líkamlegrar færni lögreglunema. Dómsmálaráðuneytið hefur tekið undir að ákjósanlegt sé að mennta- og starfsþróunarsetrið afmarki þær kröfur sem eru gerðar til líkamlegrar færni. Þá hefur ráðuneytið bent á að það hafi verið ráðherra sem hafi sett þá kröfu að mat á þreki og styrk nema skuli byggjast á viðmiðum mennta- og starfsþróunarsetursins og telur það ekki fela í sér valdframsal í andstöðu við lög.

Af þessu tilefni tel ég rétt að taka fram að orðalag e- liðar 1. mgr. 38. gr. lögreglulaga er skýrt um að ráðherra sé falið að setja í reglugerð kröfur um líkamlega færni til nema í starfsnámi hjá lögreglu. Í þessu samhengi tel ég einnig rétt að benda á að þar er mennta- og starfsþróunarsetri falið að gera tillögur til ráðherra um þær kröfur til líkamlegrar færni sem gera á í reglugerð. Ég tel að það fyrirkomulag byggist öðru fremur á því að sérþekking mennta- og starfsþróunarseturs geti nýst við að ákveða nánar þær kröfur sem gera skuli til nema í starfsnámi hjá lögreglu.

Með e-lið 1. mgr. 38. gr. lögreglulaga hefur löggjafinn ákveðið að fela ráðherra það verkefni að mæla fyrir um nánari kröfur til umsækjenda um starfsnám hjá lögreglu, meðal annars um líkamlega færni þeirra, og að það skuli gert með reglugerð. Þó svo að í nefndu lagaákvæði sé gert ráð fyrir að mennta- og starfsþróunarsetur lögreglu geri tillögur til ráðherra um þær kröfur til nema í starfsnámi hjá lögreglu, sem ráðherra er falið að kveða á um í reglugerð, fær það engu breytt um þetta lögákveðna hlutverk ráðherra. Þvert á móti verður ekki annað ráðið en að löggjafinn hafi með þessu tekið skýra afstöðu til verkaskiptingar milli ráðherra og mennta- og starfsþróunarsetursins. Hlutverk mennta- og starfsþróunarseturs samkvæmt c-lið 1. mgr. 38. gr. lögreglulaga fær þessu ekki heldur breytt enda lýtur stafliðurinn ekki að líkamlegri færni heldur að andlegu og líkamlegu heilbrigði.

Hér verður einnig að hafa í huga að umræddum kröfum er beint út á við að borgurunum, það er umsækjendum um inngöngu í starfsnám hjá lögreglu, en fela ekki sér fyrirmæli um innra skipulag stjórnsýslunnar eða önnur innri fyrirmæli. Það hefur áhrif á það hvaða kröfur eru gerðar til þess að skýrt liggi fyrir að ráðherra sé heimilt að framselja vald sitt.

Í skýringum sínum hefur ráðuneytið lagt áherslu á að taka verði tillit til þess að háskólum, sem sjálfstæðum menntastofnunum, sé heimilt að ákveða sérstök inntökuskilyrði til að hefja nám í háskóla, þar á meðal láta nemendur gangast undir inntökupróf eða stöðupróf, sbr. 3. mgr. 19. gr. laga nr. 63/2006, um háskóla. Af því tilefni tek ég fram að ekki er um það deilt í þessu máli. Inntökuskilyrði nema í starfsnám hjá lögreglu eru aftur á móti tilgreind í lögreglulögum og nánar útfærð í reglugerð sem er sett á grundvelli þeirra laga. Svo sem komið hefur fram er í þessu máli til skoðunar hvort e-liður 2. mgr. 6. gr. reglugerðar nr. 221/2017 sé í samræmi við lög. Að virtu orðalagi e-liðar 1. mgr. 38. gr. lögreglulaga og með hliðsjón af öllu framanröktu tel ég svo ekki vera.

Í samræmi við framangreint er það niðurstaða mín að með e-lið 2. mgr. 6. gr. reglugerðar nr. 221/2017 hafi ráðherra framselt það vald sem honum er fengið með e-lið 1. mgr. 38. gr. lögreglulaga til mennta- og starfsþróunarseturs í andstöðu við lög.

  

V Niðurstaða

Það er niðurstaða mín að ráðherra hafi í andstöðu við lög framselt mennta- og starfsþróunarsetri lögreglu vald til þess að setja sjálft kröfur um líkamlega færni starfsnema. Beini ég þeim tilmælum til dómsmálaráðherra að mælt verði fyrir um kröfur um líkamlega færni nema í starfsnámi hjá lögreglu í reglugerð, í samræmi við fyrirmæli e-liðar 1. mgr. 38. gr. lögreglulaga nr. 90/1996. Þar sem kvörtun A lýtur ekki að afgreiðslu umsóknar tel ég ekki tilefni til að beina sérstökum tilmælum til mennta- og starfsþróunarseturs vegna meðferðar þess á erindi hans 6. apríl 2024. Ég beini hins vegar þeim tilmælum til dómsmálaráðuneytisins og embættis ríkislögreglustjóra að hafa þau sjónarmið sem rakin eru í áliti þessu framvegis í huga.