18. ágúst 2011

Fundur vestnorrænna umboðsmanna í Vestmannaeyjum

Hliðstæð löggjöf um störf og starfshætti umboðsmanna þjóðþinganna í Danmörku, Noregi og á Íslandi varð til þess að umboðsmenn þessara þinga hafa frá árinu 1989 átt með sér samstarf.

Síðar hafa umboðsmenn þinganna á Grænlandi og í Færeyjum bæst í hópinn. Umboðsmennirnir hafa að jafnaði haldið einn eða tvo fundi árlega þar sem meðal annars er rætt um einstök álitaefni sem þeir hafa til úrlausnar ásamt því að skipst er á upplýsingum um starfsemi embætta þeirra. Einn slíkur fundur var haldinn í Vestmannaeyjum dagana 12.-13. ágúst sl. Hann sóttu, auk umboðsmanns Alþingis, Arne Fliflet, umboðsmaður norska Stórþingsins, Hans Gammeltoft-Hansen, umboðsmaður danska Þjóðþingsins, Sólja í Ólavsstovu, umboðsmaður færeyska Lögþingsins og Vera Leth, umboðsmaður grænlenska Landsþingsins. Ottó Björgvin Óskarsson, lögfræðingur á skrifstofu umboðsmanns Alþingis, var umboðsmönnunum til halds og trausts á fundinum, en svo vill til að Ottó er uppalinn í Vestmannaeyjum.