Kvartað var yfir að ekki var hægt að kaupa far í tilteknar ferðir Herjólfs í kringum Þjóðhátíð nema kaupa einnig miða á hátíðina.
Að fengnum skýringum hjá Vegagerðinni og Eimskip varð ekki séð að málum væri háttað með þeim hætti sem lýst var í kvörtuninni. Ekki var því tilefni til að taka hana til frekari meðferðar.
Umboðsmaður lauk málinu með bréfi, dags. 30. júní 2017, sem hljóðar svo:
Ég vísa til fyrri bréfaskipta vegna kvörtunar yðar til mín vegna ferjuflutninga frá Landeyjarhöfn til Vestmannaeyja og til baka í kringum Þjóðhátíð í Eyjum. Samkvæmt kvörtun yðar lúta athugasemdir yðar að því að ekki hafi verið hægt að kaupa miða í tilteknar ferðir í kringum Þjóðhátíð með hefðbundnum hætti heldur aðeins með því að kaupa jafnframt miða á hátíðina. Nánar tiltekið eru kvörtunaratriðin þau að Eimskip selji alla miða í ákveðnar ferðir til tiltekinna aðila og að Eimskip gefi öðrum leyfi til að endurselja farmiða í Herjólf samhliða miðum á útihátíðina.
Í tilefni af kvörtuninni taldi ég rétt að rita Vegagerðinni bréf, dags. 9. mars sl., þar sem ég óskaði tiltekinna upplýsinga áður en ég tæki frekari ákvörðun um meðferð mína á málinu. Mér barst svar Vegagerðarinnar, dags. 23. mars sl., og umsögn rekstraraðila Eimskipa, dags. 14. mars sl., og fenguð þér afrit af báðum bréfum um leið og ég óskaði þess að þér kæmuð athugasemdum yðar á framfæri við mig, þ. á m. nánari upplýsingum um hvernig þér telduð brotið á hagsmunum yðar eða þeim samningi sem liggur til grundvallar ferjusiglingunum. Bárust mér þær með bréfi, dags. 1. maí sl.
Samkvæmt þeim upplýsingum sem mér hafa verið veittar af hálfu Vegagerðarinnar og fulltrúa Eimskipa fæ ég ekki séð að málum varðandi sölu á ferðum í Herjólf í kringum Þjóðhátíð sé háttað með þeim hætti sem þér lýsið í kvörtun yðar. Samkvæmt svörum [...] fulltrúa Eimskipa, dags. 14. mars sl., er það ekki rétt að allir miðar í ferjuna dagana í kringum þjóðhátíð séu seldir Þjóðhátíðarnefnd þó að nefndin kaupi mikinn fjölda miða. Tilgreinir [...] að um 3000 miðar séu seldir beint í gegnum sölukerfi rekstraraðila fimmtudag og föstudag fyrir hátíðina og séu það miðar í allar ferðir þó magnið sé mismikið. Þá kemur fram að Þjóðhátíðarnefnd kaupi miðana sama verði og almennt gildir samkvæmt gjaldskrá. Um fyrirkomulag miðasölu kemur jafnframt fram að sala ferða í sumaráætlun ferjunnar hafi hafist 22. nóvember 2016 en undanskilin hafi verið m.a. Þjóðhátíðarvikan, en sala í ferðir þá daga hafi hafist 22. febrúar 2017 en það hafi verið auglýst með fyrirvara, sbr. auglýsing á vefsíðu Eimskipa, www.eimskip.is, dags. 6. febrúar s.á. Í svari Vegagerðarinnar kemur jafnframt fram að til þess að mæta eftirspurn sé bætt við ferðum og farþegafjöldi aukinn en mælt sé fyrir um það í útboðsgögnum.
Í þessu sambandi tek ég fram að af athugasemdum yðar verður ráðið að þér hafið dregið þá ályktun af tölvupóstssamskiptum yðar við [...], dags. 13. mars sl., að þá hafi ferðir í ferjuna í kringum verslunarmannahelgi 2018 að miklu leyti verið seldar. Af þessu tilefni hafði starfsmaður minn samband við [...] og fékk það staðfest að um misskilning væri að ræða. Sala væri ekki hafin í þær ferðir en svar [...] miðaðist við lausar ferðir á umræddum dagsetningum árið 2017.
Í ljósi svara Vegagerðarinnar og þeirra upplýsinga sem mér hafa verið veittar tel ég ekki tilefni til að taka kvörtun yðar til frekari meðferðar með hliðsjón af þeim atriðum sem hún lýtur að. Ég bendi yður þó á að samgöngu- og sveitarstjórnarráðuneytið fer með málefni Vegagerðarinnar og samgöngumál almennt. Teljið þér tilefni til eigið þér þess kost að bera athugasemdir yðar undir ráðuneytið.
Með vísan til framangreinds lýk ég meðferð minni á málinu, sbr. a-lið 2. mgr. 10. gr. laga nr. 85/1997, um umboðsmann Alþingis.