Bréf

Vísað er til kvörtunar yðar, dags. 18. september 2021, þar sem þér kvartið yfir aldursskilyrði launamanna sem teljast tryggðir samkvæmt lögum nr. 54/2006, um atvinnuleysistryggingar, sbr. b-lið 1. mgr. 13. gr. laganna. Í kvörtuninni kemur fram að þér teljið ákvæðið brjóta í bága við jafnræðisreglu 65. gr. stjórnarskrár.

Starfssvið umboðsmanns, sbr. a-lið 4. mgr. 3. gr. laga nr. 85/1997, um umboðsmann Alþingis, tekur ekki til starfa Alþingis. Það er því almennt ekki á verksviði umboðsmanns Alþingis að taka afstöðu til þess hvernig til hefur tekist með löggjöf sem Alþingi hefur sett, þ.m.t. hvort lög séu í andstöðu við stjórnarskrá. Í okkar réttarkerfi er almennt álitið að það sé hlutverk dómstóla að skera úr um slík atriði. Með 11. gr. laga nr. 85/1997 er umboðsmanni þó veitt heimild til að tilkynna Alþingi, hlutaðeigandi ráðherra eða sveitarstjórn ef hann verður var við meinbugi á gildandi lögum eða almennum stjórnvaldsfyrirmælum í störfum sínum. Í lögum er hins vegar ekki gert ráð fyrir því að kvörtun verði borin fram við umboðsmann á þessum grundvelli, þótt vitanlega sé öllum frjálst að koma á framfæri við umboðsmann ábendingum um slík atriði, heldur eru slík mál tekin til athugunar að eigin frumkvæði umboðsmanns á grundvelli 5. gr. laga nr. 85/1997. Verði málefni tekið til athugunar er sá sem hefur komið ábendingu um það á framfæri ekki upplýstur um það sérstaklega heldur er til­kynnt um athugunina á vef embættisins, www.umbodsmadur.is.

Samkvæmt framansögðu lýk ég afskiptum mínum af máli yðar með vísan til 1. mgr. 10. gr. laga nr. 85/1997 um umboðsmann Alþingis.