Kvartað var yfir ráðningu í starf hjá Vegagerðinni án þess að það hefði verið auglýst.
Vegagerðin upplýsti að starfið hefði verið auglýst og sá ráðni verið á meðal umsækjenda. Umboðsmaður lét því málinu lokið.
Umboðsmaður lauk málinu með bréfi, dags. 18. október 2021, sem hljóðar svo:
Vísað er til kvörtunar yðar, sem barst 22. júlí sl., yfir því að B hafi verið ráðinn í starf sérfræðings hjá Vegagerðinni árið 2020 án þess að starfið hafi verið auglýst.
Í tilefni af kvörtuninni var þess óskað, með bréfum dags. 25. ágúst sl. og 16. september sl., að Vegagerðin upplýsti umboðsmann um málsatvik varðandi ráðningu B. Í svörum Vegagerðarinnar kemur fram að umrætt starf hafi verið auglýst í desember 2019, B hafi verið meðal níu umsækjenda, ákvörðun hafi verið tekin um ráðningu hans 5. febrúar 2020 og samkomulag hafi orðið um að hann hæfi störf í ágúst 2020.
Með vísan til framangreinds læt ég því máli þessu lokið, sbr. a-lið 2. mgr. 10. gr. laga nr. 85/1997, um umboðsmann Alþingis.