Kvartað var yfir N1 Rafmagni ehf.
Ekki voru skilyrði til að umboðsmaður fjallaði um kvörtunina þar sem efni hennar féll utan starfssviðs hans. Var viðkomandi bent á að leita til Orkustofnunar með erindi sitt.
Umboðsmaður lauk málinu með bréfi, dags. 31. janúar 2022, sem hljóðar svo:
Vísað er til kvörtunar yðar 26. þessa mánaðar yfir N1 Rafmagni ehf.
Samkvæmt lögum nr. 85/1997, um umboðsmann Alþingis, tekur starfssvið hans almennt til stjórnvalda ríkis og sveitarfélaga auk einkaaðila sem að lögum hefur verið falið opinbert vald til að taka stjórnvaldsákvarðanir, sbr. 3. gr. laganna. Önnur starfsemi einkaaðila fellur hins vegar að jafnaði ekki undir starfssvið umboðsmanns eins og það er markað í lögum nr. 85/1997. N1 Rafmagn ehf. er einkahlutafélag og telst einkaréttarlegur aðili. Það fellur því utan starfssviðs umboðsmanns að fjalla um kvörtun yðar.
Samkvæmt nýlegri fjölmiðlaumfjöllun virðist Orkustofnun hafa til athugunar þau atvik sem þér lýsið í kvörtun yðar. Samkvæmt 1. mgr. 20. gr. raforkulaga nr. 65/2003 getur notandi, sem telur sölufyrirtæki ekki standa við skyldur sínar samkvæmt lögunum eða reglugerðum settum samkvæmt þeim, kvartað til Orkustofnunar. Í samræmi við það getið þér freistað þess að beina kvörtun til hennar teljið þér tilefni til þess.
Með vísan til 1. mgr. 10. gr. laga nr. 85/1997 er umfjöllun minni um kvörtun yðar lokið.