Kvartað var yfir Tryggingastofnun og kostnaði sem hlýst af greiðslum stofnunarinnar inn á erlendan bankareikning og féllu á viðkomandi.
Ekki varð ráðið að athugasemdunum hefði verið komið á framfæri við Tryggingastofnun og nánari skýringar hennar fengnar eða eftir atvikum afstaða félags- og vinnumarkaðsráðuneytisins vegna þessa. Þar með voru ekki skilyrði til að umboðsmaður tæki kvörtunina til frekari meðferðar.
Umboðsmaður lauk málinu með bréfi, dags. 9. júní 2022, sem hljóðar svo:
Vísað er til kvörtunar yðar 1. júní sl. sem beinist að Tryggingastofnun og lýtur að kostnaði sem hlýst af greiðslum stofnunarinnar á grunni laga nr. 100/2007, um almannatryggingar, inn á erlendan bankareikning yðar og fellur á yður.
Af kvörtun yðar verður ekki ráðið að þér hafið komið athugasemdum yðar um ofangreint fyrirkomulag við millifærslur greiðslna af hálfu Tryggingastofnunar á erlenda bankareikninga á framfæri við stofnunina og fengið nánari skýringar hennar eða eftir atvikum afstöðu félags- og vinnumarkaðsráðuneytisins vegna þessa atriðis, en samkvæmt 8. gr. fyrrgreindra laga fer félags- og vinnumarkaðsráðherra með yfirstjórn Tryggingastofnunar.
Af ákvæðum laga nr. 85/1997, um umboðsmann Alþingis, leiðir að hann fjallar að jafnaði ekki um mál fyrr en afstaða viðkomandi stjórnvalds til málsins liggur fyrir. Af þeim sökum, svo og þar sem kvörtunin lýtur að almennri framkvæmd Tryggingastofnunar, eru ekki uppfyllt skilyrði laga nr. 85/1997 til að taka kvörtun yðar til frekari meðferðar að svo stöddu.
Með hliðsjón af framangreindu og með vísan til 1. mgr. 10. gr. laga nr. 85/1997 lýk ég umfjöllun minni vegna kvörtunar yðar.