Bréf

Vísað er til kvörtunar yðar 3. október sl., f.h. X ehf., en af henni verður ráðið að hún beinist að úrskurði fjármála- og efna­hags­ráðu­­neytisins 14. júní 2021 þar sem staðfest var ákvörðun tollgæslu­stjóra um að stöðva sendingu á 40 rafmagnshlaupahjólum og tveimur golf­skutlum til landsins.

Þar sem ekki varð fyllilega ráðið af kvörtun yðar að hvaða ákvörðun eða athöfn stjórnvalds hún laut hafði starfsmaður umboðsmanns samband við yður símleiðis í því skyni að afla frekari upplýsinga um efni hennar. Í símtalinu kom fram að þér væruð aðallega ósáttir við fyrrgreindan úrskurð ráðuneytisins en einnig við málsmeðferð Vinnu­eftir­litsins í málinu. Í kjölfarið senduð þér umboðsmanni ýmis gögn og samskipti við stjórnvöld vegna málsins.

Um skilyrði þess að kvörtun verði tekin til meðferðar af hálfu umboðsmanns er fjallað í 6. gr. laga nr. 85/1997, um umboðsmann Alþingis. Þar segir í 2. mgr. að kvörtun skuli bera fram innan árs frá því er stjórnsýslugerningur sá, er um ræðir, var til lykta leiddur. Í 3. mgr. sömu greinar kveður á um að ársfresturinn hefjist frá þeim tíma er æðra stjórnvald fellir úrskurð sinn í málinu ef máli er skotið til æðra stjórnvalds.

Þar sem kvörtun yðar lýtur að úrskurði fjármála- og efnahagsráðuneytisins sem var kveðinn upp utan árfrestsins eru ekki skilyrði að lögum til þess að hún verði tekin til frekari meðferðar. Hið sama á við um samskipti yðar við önnur stjórnvöld, sem þér senduð umboðs­manni afrit af, í tengslum við málið enda verður ekki annað ráðið en að þau hafi einnig átt sér stað utan fyrrgreinds árfrests. Tölvubréf yðar til fjármála- og efnahagsráðherra 24. mars sl. hróflar ekki við þeirri niðurstöðu.

Með vísan til framangreinds lýk ég athugun minni á kvörtun yðar, sbr. 1. mgr. 10. gr. laga nr. 85/1997.