Kvartað var yfir því að dómsmálaráðuneytið hefði ekki afgreitt beiðni um aðgang að gögnum sem send hefði verið skömmu fyrr.
Umboðsmaður taldi ekki slíkan drátt hafa orðið á afgreiðslu beiðninnar að ástæða við til að taka erindið til frekari athugunar.
Umboðsmaður lauk málinu með bréfi 29. mars 2023.
Vísað er til kvörtunar yðar 15. mars sl. yfir dómsmálaráðuneytinu. Í tilefni af kvörtun yðar hafði starfsmaður umboðsmanns samband við yður símleiðis 22. mars sl. þar sem þér upplýstuð að kvörtun yðar lyti í grunninn að því að ráðuneytið hefði ekki afgreitt beiðni yðar um aðgang að gögnum sem þér senduð því vikuna á undan í tengslum við veitingu ríkisborgararéttar með lögum vorið 2022.
Stjórnvöldum ber almennt að svara erindum sem þeim berast án ástæðulausra tafa, sbr. eftir atvikum meginreglu 1. mgr. 9. gr. stjórnsýslulaga nr. 37/1993. Það hvort um óeðlilegan drátt hafi verið að ræða á að stjórnvald svari erindi er því byggt á mati hverju sinni þar sem líta verður m.a. til efnis viðkomandi erindis og málsmeðferðarreglna sem stjórnvöldum ber að fylgja við afgreiðslu þess. Með tilliti til fjölda erinda sem stjórnvöldum berast verður jafnframt að ætla þeim nokkuð svigrúm í þessu efni. Þá hef ég einnig litið svo á að rétt sé að sá sem ber fram kvörtun vegna þess að dráttur hafi orðið á að stjórnvald svari erindi leiti fyrsta kastið sjálfur til stjórnvaldsins með ítrekun á erindinu og gefi því þannig færi á að bregðast við áður en leitað er til mín með kvörtun. Ég tel að ekki hafi enn orðið slíkur dráttur á svörum dómsmálaráðuneytisins við erindi yðar að tilefni sé til að ég taki erindi yðar til frekari athugunar.
Í samræmi við framangreint lýk ég hér með umfjöllun minni um mál yðar, sbr. 1. mgr. 10. gr. laga nr. 85/1997, um umboðsmann Alþingis. Ég tek fram að þér getið leitað til mín á nýjan leik verði óhóflegur dráttur á svörum ráðuneytisins að undangengngum ítrekunum.