Fulltrúar frá 28 Evrópulöndum sem sinna eftirliti á grundvelli OPCAT, valfrjálsrar bókunar við samning Sameinuðu þjóðanna gegn pyndingum, hittust á ráðstefnu á vegum Evrópuráðsins og Evrópusambandsins í Strassborg í liðinni viku. Sérfræðingar á vegum Evrópuráðsins héldu einnig erindi um ýmis atriði sem huga verður að við eftirlitið.
Á ráðstefnunni var meðal annars fjallað um helstu áskoranir við eftirlitið, leiðir til að auka árangur af því, ýmis siðferðileg álitaefni sem huga þarf að við eftirlitið, hvernig unnt sé að bæta eftirfylgni með tilmælum á grundvelli þess, koma upplýsingum um það á framfæri og tryggja gagnsæi um starfsemi þess. Áhersluatriðunum var svo fylgt eftir með því að þátttakendur í ráðstefnunni leystu raunhæf verkefni í smærri hópum. Skrifstofustjóri frumkvæðismála og OPCAT-eftirlits umboðsmanns sótti ráðstefnuna og hélt meðal annars erindi um styrkleika og áskoranir í eftirlitinu hér á landi.
